Nun inţanni

A pian aţanga a ni hnih naah nun a inţan. Ni bik ni si lova ni danglam a ni a, ni lawmawm a ni. Zirna inţan ni a ni a, chawl lova ngaihtuah tura thluakin hna hna thawh ţan ni a ni Khawvelin hmel thar a hmuh ni a ni a, phurrit hnungpuak tur nau thar a hrin ni chu a ni.

He ni hi ka tan a pawimawh ang tih reng ka ring ngai lova, ka ngaihtuah ngai hek lo. Mak tak maia thlunzawm kan ni a, ka tan chuan ni ngainatawm tak a ni. Thil mak ngaisang lo chi ka ni a, mahse he nĩ-in ka nuna hmun pawimawh a luah tak dan erawh hi chu a mak a ni. Khai mah aw…

Tlangval ka hre ţan ve hlawt tihah khan lenna tur ka zawng ţan a. A zei lo chi mah ni ila zawng nafam chuan ka hmu ve mai. Zan tin ka leng a ni ta ber a, ka inrin hmain ka la na hle a lo ni. Khawvelah hian duh dang an piang ang tih ngaihtuahna chang kan hriat hma kha a ni bawk a, kan induh ve hliah hliah teh asin. Rin ai takin kan inkawp rem a, lenglut ve ta reng chu a chhungte pawhin min hmelhriat ve viau mai.

Thil tam tak kan tidun a, hmun tam takah kan kal dun a. Mitthi lumennaa inzui kha nuam ka ti ber. Thlasik a thawt hnu phei kha chuan shawl te kha a rawn inring vei thlap a, puan hnuai lama kut inkhalhsak niap niap kha kan tum ber a ni. Zai a chawi teh asin. Mak ka tih deuh chu - kut a luma thinlung a inhawng ta mai ţhin hi! Kut hian thinlung a lo zen reng alawm le. Mak tak a ni. Huatna rilru zawng zawng a bo fai vek a, hmangaihnaa chhun khahin kan awm thuai thei nia. Tu khawkha hriat lohvin titi luam chuang lem lovin hnuai lamah kan inbe melh melh a, tlaivar te lek lek a hahthlak loh ě, rei lo em mai.

Shawl kha kan inzawn lek chauh a ni naa min suihnghet chiang em mai a, ‘mi hi engtin nge an in\hen theih zawk le?’ tiin ka ngaihtuah fo mai. Nupa te phei phei, Pathian hminga zawm an ni phawt a, chutah khum khatah puanthuah an han inţawm ta ţhin a nia. Mahse tun thlengin inţhen an la ţhulh miau si lova, a har lo a niang. Tih tak ěmah chuan keini pawh shawl kan inzawn loh laiin alawm kan inzawmna a chah tho le, an insin ţawm reng bik lo a niang.

Tichuan, nikhua a her ve zel a. Hnama chiang inti tak ni siin hnam dang nula hmel hmuh nuam ka ti ve ta thung a. A vun a nalh si, a hmaifang a dik si, a zen nalh bawk si, a hleitling bawk si, min hre bawk si… a nui hmel te kha en nin a awm thei lo hrim hrim. Tlangvala pumpa khan a nui hmel hmuh chakin a nuih seih theihna tur niawm deuh titi kan vawrh reng mai maw le. Zingah a hmelţha a, chhun ni sat lai takin a hmelţha a, tlai ninemah a hmelţha a, zan thla eng hnuaiah a duhawm lehzual.

Mi hip thei chi hrang hrang zingah a hip na ber a, ka mit a lerh lo hlauh zawk a, ka vannei - ka hmuh loh laiin ka mitthla mai a. Chuti ni lo phei se ka zawng ruai reng ang chu. Tun hnua ka ngaihtuah leh hian min lo ‘care’ ka ti alawm le. Khawi lovah kal dawn ila, ka zawnah/ ka kiangah a nih loh pawhin ka hmaah zel a kal a. Lung chhuihbah palh lakah min veng a lo ni reng mai. Ka hnung zelah kal ţhin sela chuan hma lam ka hmu kher lovang a, tawhsual tawh ka harsat lo tawp ang. A ‘caring’ ngawt mai.

Kha pawh rei kan inhriat hmain hun tiam a thleng a, kan inkawp hmain kan inţhen a ngai ta mai a. A nui hmel leh a zũn min hnutchhiah a; a thilpek te pawh lang lo liama lang ngai lo tur min nghahtirtu mai chauh a ni ta. A laka Mizo pasalţha nih mai kha ka hnial lo hman teh asin. A uiawm duh teh e. Mahni inthiam chawp chung zelin, ‘Hnam dang hnena Zo nun zemawi lantirna remchang a ni awm tho si a, ram tana fehchhuak te pawh kan nihna lai te pawh a awm thei tho awm sia aw…’ kan ti vawng vawng mai a nih hi maw…

Hemite pahnih ka hmelhriat hma daih tawh hian hmeichhe pakhat ka tawng tawh a. Chu chu ngaihzawng ka hriatthiam hma, rawlthar rawl chau ka nih hma lam daih tawh kha a ni. Ka hmeichhe hmuh hmasak ber a ni hialin ka ring. Fel ka tih hmasak ber a ni a, sual ka tih hmasak ber pawh a ni awm e ('nge min hauh teh ei…). Ka zawm duh loh tur thu min hrilh a ching phian lehnghal.

A hnen aţangin thil tam tak ka zir a, nun bul min ţanpuitu a nih avangin ka tan a hlu a ni. Ka ţhatna tur ngaihtuahin min hauh a hreh lova, nakin zela ka lawmna tur a nih hriain khatih lai khan huat hlawh a huam. Hmangaihna te, khawngaihna te, zaidamna te, rinawmna te, felna te leh thil \ha tinreng min kawhhmuhin min zirtir a. A thiam thei lo chi ka lo ni kher a, chumi lo lam zawng – huatna te, itsikna te, thinchhiatna te, deusawhna te leh thil ţha lo tinreng ka thiam hmasa zawk hlauh thung.

Ţap chunga ânkhum ka ching a, krismas bazaar lŭn lai takah ka timualpho fo mai. Hmangaihna neitu a nih miau avangin zah a tuar hram hram a, mi enrawn nih a hnial lo mai chauh a ni. Duh ni se zakin min tlansan daih thei alawm, mahse ani chuan chutiang a ti lul lovang. Thla kua zet min ak a, zun leh ek ka hriat hran hma daih tawh aţanga min chawitu a ni a, mahnia ding thei ka nih hma loh chuan min dawm a ţhulh lovang tih ka hria. Ka nu a ni tlat. A sual ka tih hian ka sual vang a lo ni châwk a, a thu ka awih mai hian mi fing ka lo ni. Ka ngaihthlak peih loh lai pawhin thu ţha min fah peih ngat kha a ni a, a hlu a ni. Ka naupan lai aiin tunah hian a hlu ka ti zawk a, ka dam rei poh leh a hlutna a zual zel dawn a nih hi le.

Heng mi pathumte hi chhan hrang hrang avangin ka nuna hmun pawimawh luahtute an ni. Anni lah chuan an hre der si lo. Mak tak maiin nun an \anni a inang vek a, chu chu A pian aţanga ni hnih niah a ni. Ka tan he ni hi 'nun inţanni' ni mai awma mawi a ni.