Rini hnena ka thawnthu sawi tur - II

Inrinni a ni a. Ka awm âwl kher bawk a ka va hman tak em. Hetia han awm âwl deuh lah hian hla ka’n ngaithla ve thlazen a. Hla rau rauah min chawk phûr thei lam aiin tlêma lungkuai lam hi ka’n ngaina ve ngei bawk a. Mood a fuh duh cher cher hle mai.

Hetih lai tak hian alawm message ka dawn teh nawlh ni. Mahse tu a nih hre hek lo i, ka hla play meka ka chên êm êm lai a ni kher bawk nen, ka en hmanhmawh duh lem lova. Chutia muangchanga ka phone ka han lek chuan a hming ka hmu ta kuau mai a. Hriat loh der theih hauh lohvin lung a phu leh ta dup dup mai. Ka hmanhmawh thar hle a, ka hawng ta thuai a.

Thawn 1-na

Ka chhiar a, ka chhiar nawn leh a. Tum aiin ka chhiar zo hma zel mai. Ka kham lo. A tawp nan ka tia ka chhiar leh a; a message ka dawng chu ka va lawm tehlul êm! Insawifiah paha sei taka chhân ka rilrûk a. Mahse, a message hi, “in in bulah mawitei hria m?” tih zawng a ni si a, chhân thui vak ngaihna a awm lo. A mi zawh ber kher hi ka la hre lo zui ta dah a.

Hreh tak chungin, “k va hre my lo ve ooo…L” tih zawngin ka chhang a. A tâwpah erawh hmangchang hria inti takin emoticon ka zep hram a. 

“kk… poi lo my”

“puih che ka chak tehlul nen ka pui thei lo che chu a zia lo hle mai…”

“a ho ltk, i hryt tkin ka ti my2 mwle”

“kk… nidangah mamawh i neih mial chuan min rawn zawt leh dawn nia, ka hre tawh ngei2 ang… hehe…”

“hehe.. tehreg my”

Tun ţum chu kan inbe sei ve ta deuh. Mualpho lovin ka chhuak niin ka inhria a, a lâwm pawh ka lâwm khawp. Ka lâwmna hi ziah tham a ni ngat a, hetiangin:-

1) Kan in awmna a hria

2) Ka number a nei

3) Thil zawh tlakah min ngai. Mi pangngaiah min ngai.

4) Kan in bul velah keimah min ngaihtuah chhuak hmasa ber.

5) Kan inbiakna tawp lam enin keimah ang thovin a lâi ve deuh. (Hei hi chu ngaihruat thil a ni mah. Mahse, a dik ang!)

6) SMS-a nula biakah hma ka sawn hle.

Parukna thleng hi ni mai teh se. A dang pawh a la tam a, mahse, a personnal deuhah ngai mai ila. 

Eng tika apply tur nge?

‘A fuh dawn e,’ ka ti rilru a. Thuziak (kutziak pawh ni lo) tâwi tê tê ringawt pawhin chuâi a pai dan te ka ngaihtuah mawlh mawlh a. Hmelţha chu an thuziakah pawh a hriat ngat mai ka ti a. A hma minute nga lek kal taa engmah beisei nei lovin beiseina sang tak ka neih tâk dan erawh ka chhut chhuak zo ta lova.

Vai film nise khumah ka fân ka fân awm asin maw. Khawi lai park-ah emaw han inmanţhelh ve ziai ziai thei ila aw! Ka zei ve hian ka ring khawp a. Thingkung te pawh remchang takin huan lailîah inphun ngei se, han ‘tîk-a-barakhaih’ hluam hluam tak ka nâp. Mahse, chung zawng zawng chu ka text dawn nen chuan a inkungkaih duah lem lo, keimaha hriatna thazâm phur phengin a zeldin chhoh mai mai a ni mah.

Eng pawh chu nise, ngaihzâwng atan ka ţha dawn riauin ka hre thar viau mai - tihlâwm ka awl dawn tlat.  Amah lah chu ka duat nasa dawn si a. Hetih lai tak phei hi chuan han thâibawihpui riap mai kha a ‘MAN’ dawn riauvin ka hre hial a. ‘Tuarna phena malsawmna’ an lo tih ţhin te pawh hi he lam thil daih hi a lo nih hi ka ti rum rum.

Thawhlehna ni

He ka hlimna hian ni hnih leh zan hnih chiah chiah a daih a. Chutih chhung zawng chuan eng dang ka ngai lo; mut leh chaw ei a tui chuan a aia nun thlakhlelh tur ka hre lo. Muthilh hma zawng kan inbiak tawhna ngaihtuah let chungin a aia ţhaa chet theih dan tur tactic ţha pui pui ka duang zut zut a. Hemi hnu tawhah hi chuan zei loh hi thil theihah ka ngai lo. Mahse, ‘engtikah nge ka apply ang’ tih lam erawh ka ngaihtuah chhuak zo ngang lova, hei hian ni hnih leh zan hnih hnuah min kai harh ta chiah reng a.

A ni thum niah chuan ka tho a, ka harh thar ta. Ni hnih kaltaa ka hlimna leh lâwmna te kha chanchin ţha a la tling zo lo a ni tih te ka hre ta zel a. A rang a ranga muang lei ata chhuaka hmangaihna kawng ţhuampui lama chuân chhuah a ţûlzia ngawt chuan mi mawlh ta mai a. Hun bî a inkhawn apiangin ka lung a phû a, a bi tinah amah ka chân ţhen zel niin ka hria. Darkar tin mai chu en lohvin ka liamtir hlei thei lo.

Chungti chungin hun ţha nghah chhungin ni hnih khat chu a liam leh mai a. Huaisenna sawm khawm chhungin ni thum ni lî vel zet a liam leh a. Ţawngkâ pawh ni lo, sms-a ka biak ngam meuh chuan kar thum dâwn a lo ni tawh a. A hma zan chuan a tûk zanriah ei hma minute 15 vela text turin ruahhmanna ka siam a, chumi nileng chuan ka phone hi ka thlah lo a ni ber.

Thawn 2-na

A tawp a tawpah chuan ka hun tiam a thleng ta. Reiek tlang hnuai lama ni a liam hma hret, a chanve vel a pil tawh si lai tak chuan, “dam maw? chaw ei tawh m?” tih chu ka thawn ta var a. Remchang taka, “chaw ei tui o…” tih kha ka duh ber chu a ni mai a, “Dam alawm… ei dawn tep e,” rawn ti se ka ti hle mai. A ţha ber beiseina nen ka nghak a. Rin aiin a rei hma. A hnua ka en lehin ka thawn hun leh a rawn chhan let chhung chu minute khat âwrh chauh a lo ni a, mahse ka nghak rei.

“dam alwm. k eikham ciah,” a rawn ti ta heu mai! Rin a ang lo teh asin.

Chhân lêt dan tur ka vân leh ta angreng khawp a. “i puar a nih chu,” tih mai tur chi nge maw ni ka ti hman a. Mahse chu êm chu ka thawn ta bik lo. ‘a nih chu… in va ei hma ve…’ tiin ka thawn ta zawk a.

“nia, znin cu inkhwm zn a ni sia kn ey hma a”

“a ni awm tak e… van fel thei bik…”

“haha… chutia mi? nag pwh i inkhwm ve thrn tho kha”

“hehe.. ka fel ve tho a niang… hihi… nilai zan hi chu a peihawm loh thin em a ka ti mai2 maw le…”

“nia, mhs inkhwm te cu inchhirwm loh nem… hehe”

“dik chiah… ka tibuai rei ltk palh ang che.. i insiam duh ang e… inkhwm nuam auh.. J”

“ole.. nag pwh le”

Ka zâm ang aiin kan inbe rei. Kan thusawi hian hmangaihna lamlian a hawi ruah lem lo nain hei chen kan tîtî thei hi hmasawnna chu a ni hrim mai. Kan inbiak zawh rual rual chuan thluakin hna a thawk leh nghal thuai a. Rei lote chhungin text thawn leh hun tur a duang fel leh thlap tawh.

Buiin lung a tawk em ni?

            A ni indawt zut a han biak chu ka tîm deuh a. Vir pilh palh hlauvin ka invêngthâwng hle. Tichuan, text dang pawh kan inthawn ve ta zeuh zeuh a. Kan thusawi pawh a ziaawm chho viau e. Kan innel ve telh telh a, kan infiam tam telh telh bawk a. Mahse, inlêng neih a peih tlat lo! Bui lung tawk ang hlauh ka ni ta mai a. 

Din chawta inher thuta lêt vang vang ka nâp a. Mahse, beiseina – nun awmzia neihtirtu – hian min pawt ding leh rih a. Biak zêl phawt mai chu ka thlang ta a, ka be ta zêl a. Ngaihruât theih tur awm ang dâwn dâwnin fiamthu leh thu tak ka sawi pawlh nawk nawk a. Eng chen chiahin nge hna a thawh tak ka hre chiah lo. Kan inbe zel phawt a.

Ka ngaihtuah lêt a, ka pa khan nula biak dan te, zei dan te, ngaihawm riau dan te leh ngaihzawng neih kawnga hriat tur pawimawh ang chi hi min lo hrilh hauh lo a ni tih ka hre chhuak a. Mihring hian nuna thil pawimawh tak te hi kan lo hmaih nasa hle ţhin a lo ni. Ka pa han dem chiâm lah a sawt lêm hlei lova. Ka vei zui viau a. Kan dama fate kan la nei ve a nih ngai chuan heng thil hi uar taka zirtir ka tumruh phah hle nghe nghe a.

Rini hnena ka thawnthu sawi tur - I

Thawnthu inhrilh tum ve ta chu, ‘Hmaaann lai hian maw…mmm…’ tia bul han ţan te pawh a chakawm hle mai. Mahse, he nunchan thawnthu hi chu hun rei tawh taka thleng a ni lo hlauh a, a ţul lem lovah ngai mai ila. Sawi ţan tawp mai ang aw…

A chepa kai

A hming chu ka contact list-ah a awm kiau a. A hmasa ber a ni lova, a hnuhnung ber a ni hek lova; mahse a langsar ber lawi a. Midang call ka tum lai reng te hian ka hmet chhuak leh nawlh ţhin a. Val hi min chhaih chiang a ni.

A hming ka hmuh rual chiah hian Kohhran hlim vanglaia khuang nufa inrawn ang maiin ka lungphu hian min nghawr dup dup mai ţhin pek a. A ri ring em a amah pawhin engemaw chen chu a hria ang. Heti taka ka lung a phu ţhin hi hriselna atan a ţha kher lo theiin ka ring hial a. ‘Zawltling vawn nat’ an tih pawh hi natna kai awl tak a nih ngei ka ring ta ngawt a.

Chutia a hming ka hmeh chhuah tak fo siah chuan vawi khat chu ka huaisenna sawm khawmin ka text ve ta rawih a. Ţawngkam lah chu ka haihchham khawp a. Ngaihtuah fê hnuah, ‘dam mw? ge tih? buai m?’ tih zawng ka chhu a, ka thawn ta a. Ka phone chu ipteah pawh dah lut phal lovin beisei nei si, beisei ngam tak tak si lovin ka keng zui zat a. Ka helhhawlh bawk a second tam a liam hmain vawi nga vel lai chu ka phone ka en hman awm asin.

Intawn vawi khatna

Tichuan, nula fel ngang a ni bawk a min rawn chhang ve teh mial a. A rukin ka nui var a, ka zam hle bawk. Inbox ka han hawng tur chu ka phur viau nain eng angin nge min rawn chhan let ang tihah ka buai leh pek a, ka tirilah min thing sek a. Ka kut pawh a vibrate deuh.

Ka han chhiar a, ‘dam alwm.. buai love…’ tih zawngin min rawn chhang a. Hetiang chiah hian hmanniah ka ţhianpain min rawn thawn a, eng teh ualah ka ngai lo, mahse tun ţum zet chu a mi den dan a dang zar mai. Thu ngaihnawm pawh hi a sawitu azir mai mai a lo nih dawn hi ka tih phah hial a ni.

A chanchin hi tu-khaw-kha hriat lohvin theih ang tawkin ka ngaihven ve a, ka duh chin chu ka hre thawkhat viau mai. Nula pangngai tak, ‘tunlai nula’ – hna ţha zawnga inzir mek, a inzir kar laka in lama mi ţul tak a ni a, engmah ti lovin a awm awl ngawt ngai lo tih pawh ka hria. Hetia, ‘buai love’ tia min chhang mai hi mak ka ti lehling a; ‘A buai lo tak tak ang em? Nge a mawiah dawt a sawi mai mai zawk? tih te ka ngaihtuah a.

A eng pawh chu ni se, inthlahrung lutuk lovin a biak chhunzawm theih tih a chiang a, a tawk. Ka chhiar nawn leh a, ka tan a inhawng hlein ka hre ta tlat a. ‘mmm… a fuh dawn e, min iai bik lo a nih hi…’ ka ti rilru a. Ka lawmna a nasat tluk zetin ka lungphu a rang a. Tlai lama ka lo inkhelh ve zeuh zeuh vang nge maw ni, warm-up hlim ang maiin ka thaw pawh a sa ta phat mai. 

Sa seh mualah

Ka ngaihtuah thui lutuk hmain thu thawn let tur chhut ka tum a. A bul ka ţan chauh a, a zawmna tur ka bo ta tlat pek a. ‘A ni mw? i buai lo tk2 mw?’ tih te chu ka han chhu chhuak a; mahse, hei em han thawn let chu ka ti deuh bawk si. Lehkhathawn ziah dan - kan naupan laia kan zir te kha ka ngaihtuah chhuak a. ‘Ka ngai ţhin khawp mai che. Pathian zarah kan inhmuh leh thuai ka beisei..’ tih te chu ka han hre chhuak thuai a.

Ka phone chu ka’n hmet leh kauh kauh a. Tam ka chhut hma chuan a enga maha hmaa ‘ka ngai thei khawp mai che’ tih nghal tâwng chu ka ngam leh ta lova. Thil pawi em em mai chu love story ka lo chhiar ve tawh hovin min pui miah lo hi a ni. Thu ţha phuah chhuah tur ka hre ta ngang si lova kan inbiakna a tawp chu a ni ta mai a. He mi ni aţang hian inbuatsaih lawk lova nula biak chu sim chi-ah ka ngai hmiah a, ‘ziaka inchhawp a ţha mang e’ te ka ti hial a.

Thawn let tur han hriat miah loh mai chu ka uiin a tlawmthlak ka ti khawp mai, mahse ti theih tak tak ka nei law. Amah zawk tak pawh a hrilhhai viau ta ve ang. A nih nih ka ni zo tawh a, inhnemna tur ka zawng zui ta ngawt a.

Khatia ka va biak uk tawh hnua ka reh daih kha tlangval zei ţhenkhatin tleirawl an han kheuh zeuh a, ti lo awm taka an han awm vel daih angah te ka inchan a. ‘Nangmah i ni chiang lutuk…’ tia an han zawng let vel ang chiah hian, ‘eng nge niang aw…’ tia min rawn ngaihven zui viau turah ka ngai thei ta a. Tiţha ka inti hnuhnawh kher asin.

Lei hi hnuchhawn ram a lo ni

Ni a liam ve zel a, hmasawnna sawi tur erawh ka nei hran lo. Mang lama han man ngial ka tum pawhin a inlar duh ta reng reng lova.  Khatia bung lutuk tak maia ka tawp san ta kha a lungni lo hle ni ngeiin ka hria. Ka biak laia ‘buai lo’ kha tunah zet chuan a buai ta hle a nih hi ka ti rilru a, ka dem hran lo.

Zawi zawiin ka thlah thei dah law maw tiin vei ut ut loh ka zir ta a. Chhun lamah chuan ka hre lo der thei mai a, zanah erawh chuan mut dawnah tak hian mitthlaah fiah kek kawkin a rawn lang leh tlat ţhin a. Ka mit ka han hup a a hmelţhat a zual sauh bawk si. Mut chhuak viau e ti lovin ka inlet ka inlet a, a daih rei phian zel lehnghal a.

Zan khat phei chu van laizawlah thla a mal din tau mai a, a bial vei pap a, a eng em em mai bawk a. ‘Khi ngei khi a nih khi nula tlangvalin an lo lawm thin chu,’ ka ti rilru a, mahse ka lung a len lo. Ka ngei. ‘Nang kha…’ min ti niawm takin min rawn chhun siah a; min hmusit hlein ka hria. Zungchala kawh let sawk sawk paha, ‘Nang pawhin i nei bik lo, inhmusit thei kan ni leu…’ han tih siah siah mai ka nap a. Ka theih loh lam tak a ni bawk a ka anpui chu ka hre thei khawp.

Keimah Samdala

Sawt vak lo chuan ka inzir ve zel a. ‘Amah ngei lo chu..’ titu tam tak, kei aia risk huai fê fê an awm nuk ang tih ka hai lo, mahse, tu dang mahin ka rilru an la peng thei lo. Ka laklawh ve tlat tawh. A hming kheuh chhuah dan awlsam zawk pawh ka zawng hmu ve diam tawh a, chutia tawp san mai thei ka ni bik lo. A thuhrimah pa-tum-tlang tak ka ni ve bawk a, beih hmaa hlawhchham ngawt chu a thiang lo hulhual ka ti ve tlat.

Ka lo tih ve uk tawhna erawhin min phuar tlat tawh a, hmalak pawh ka tim phah viau mai. ‘Ka inrin loh laiin min rawn text se…’ tihte chu ka dream a ni nawk tawh a. Samdala chengkek rah hmu ang chauh ka ni. 

A zei loh dan kha ka duh chi

Kan inhmelhriat aţangin kar thum a ni ta. Ni dang ang bawkin kan haw rual leh a. Kan innel ve ta deuh bawk a a ţawng tui tam ve ta deuh. Titi vawrh tur ka hriat mai loh avang leh a tui zawng leh ngainat zawng ka la man chiah loh avangin a ngai tein an chhungkaw chanchin bawk chu ka zawt leh a. A hriat bel lam tak a ni bawk a, min chhang ţha viau mai.

Bus Stand leh a chhehvel

Mobile phone-in min rũn hma lam thil daih tawh a ni bawk a kan inbiakna hmasa ber pawh Bus Stand a ni ngat a. Ti ril khũr der der chunga a hmaah ka dinga ka inhmelhriattir tâwng ţuma a chet phelh ve zia kha! Khaw dang a hawi zuk a, mahse a a rawn lehhawi thuai a. A ţhiannu khan ‘pa’ min tih hmel teh asin; a sirah a lo nui var a.

Tlai nga vel zet a kan haw rualna a ni ta. Bi thar kai nan innel lam thu kal pelin a tui zawng ka ngaihven ţan a. Tleirawl tawh phawt chu rimawi hian min sâwi bera hriain music lam sawipui kan tum thla ngawt a. Khatih laia lar te kha chu a hmelhriat ngei a, mahse tam kan sawi hmain chuti teh chiamin a ũksâk lo tih ka hria a, kan sawi zui thui lem lo.

‘Engin nge a lung len ang?’ tih ngaihtuah ru reng chungin thiam lo takin fiamthu ka thawh chhunzawm zat a. Pa fiamthu thiam lo tak ka nih ka hrechiang hle. Keimah zawk tak pawh ka nuih a za lem lo, mahse, a mawiah a nui lui hram hram a, haw pui zel atan ka hual ta viau reng a.

An in lamah

A eng pawh nise kawngtluana ngawih reng thu a awm lova, eng eng emaw chu kan sawi ve ngei e. An in kan thlen dawn hnaih lamah phei chuan zana len te kha ka dil ta niin ka hria. Ka hlawhtling lo phawt a. A ţang ţung lem lo nain a chhuanlam kha thu tlingah ka ngai a ni ber; zirlai nih nen, inleng neih ngai loh nen, ţhenawm hnaivai lawiluhna ber an lo ni kher bawk nen zan lama len kha chu ka tum buai duh bik ta lova.

Pathianni vawi khat erawh chu chawhnu lam herah sawi lawk lem lovin ka lenglut rawih a. A chhungte chuan min lo chhawn ve mai a. Khami ţum kha ka chhui let chang hian tu zawk nge lai zawk ka hrechiang thei ta lo. Zirlaibu nen a lo inchhawp rap mai ka han hmuh chuan ka zak rilru hle a. Khatiang hun awl ţhaah miin lehkha an zir ţhin tih pawh ka lo hre pek lova! Ka tibuai ngeiin ka hria.

Mahse ka kal chilh ve tak miau si ah chuan a indah fel ve mai a, ka ţhutna aţanga ding thlêk deuh ngaiin a ţhu a. Hmuhnawm tih vang pawh ni em em lovin T.V chu kan en ta reng a. En reng han tihah titi kar lakah kan en ti ila a mawi mah ang, kan titi tam lo em mai pawh a. Thingpui te pawh min lum a, ka in a. Len vawi khatna chu ka tlak ta.

Tichuan, ka vawi khat lenluhnaah chutiang thil hrang hrang ka tawn takah chuan tlai lama haw rual kha thupui rih mai a ţhain ka hria a, Pathianni dang leh zelah pawh ka leng chhunzawm em em lova. Kan inkawm tam telh telh a, kan inhre chiang telh telh a, a lawm zawng te pawh ka sawi thiam chho ve zel a. Ka fiamthu thiam loh kha chu a la ngai reng nain nuihna tur sawi ka ching chho ve zel a, kan nui rual thei ve zel bawk a.

Cricket leh kei

Chutia lungrualna tlang kan thlen chhoh ve zel hnu chuan tun hma zawnga ka ngaih pawimawh lem loh, sport azawnga ka ngainat loh thin ber pakhat, cricket ka tuipui ta phian a. Rimawi lam chuan ri a chhuah zui ta lo. Cricketer lar, Brad Lee a hmel leh pian zia te, a hairstyle te ka chîk ta viau a. Han zawn han zawn takah chuan eng tin tin emaw inanna lai te pawh kan nei ve e.

Tichuan, thla tam a liam hma chuan eng eng emaw vangin rei ngial sikul kan chawl a. Hun ţhaa chan ngei ka tum ruh hle mai; a lo thlawn a liamtir mai ka tum lo. Pathianni tlai khat ka tei luh ve tawhna khan min ti huangtau ve deuh bawk a, chhun lamah an in ka lawi lut ta fo a. A chhungte lah ka lakah an ţha. Kawngka ka kik dat dat zawha ka luh chiah hian, ‘a changtupa rim a nam ka ti reng a…’ an lo tifiam vei ţhin a. ‘A changtupa’ ni riau hian ka inhre nghe nghe a. A changtupa nih chhunzawm zel pawh ka tum ta viau reng a.

A zei loh dan hi ka duh chi

Hun te a lo kal zel a, kar lovah Krismas ka hnaih ta hle mai. Tlai khat kan haw dun chu mi tih ţhin dan a nih ringin Krismas-a an khuaa haw a tum leh tum loh leh hman ho a chakawm thu te ka sawi hlut a. Ka che ţha viau dawnin ka hria a. Mahse chuti awzawng a lo ni lo. kum lo awm leh zel turah chhungkaw kima inhmuh tawh loh te pawh thil awm thei a nih avangin krismas hi chu chhungkua inhmuhkhawmna hun, hmun hranga awm te pawh an haw khawm hun tur zawk a nih thu min fah ta zek a. Ka tum angin ka che ţha lo chiang kher mai.

Kha zawhna kha zawhna ka zawh tawhah chuan ka zawh fuh loh ber, chhanna ka dawn ţhat ber niin ka hria. Ka zak rilru hle a, ka lawm hle bawk. A puitlin zia ka hriatin amah ka zah sawt a, ka duh zual sauh a. Hetiang nulat tlangvalna lam thil hi chu hmeichhiat mipatna tel lo pawh nise ka sawipui ta lem lova.

Keimah Fanai Pa

Hringnun hi hlim leh lungngaih inkar mai niin ka hre ta. Ka hun tam zawk erawh tuilairapin ka hmang a, ka lungngaih ni aiin ka hlim ni a tam zawk ngei ang tih ka ring bawk. Nimahsela, lungngaihna hian min uai rih zawk miau avangin hringnun hi lungngaihna mai niin ka hre fo ţhin.

Dam rei lo tur mi

Kum 20 tling tura nghah a ngaih reizia leh a râl kai hnua Krismas zawha kum a thar ran tak zia ngaihtuahin eng chen pawh nung ila ka dam rei dawnin ka hre ta lo. Kum 5 mi ka nih lai khan ţhiante zingah kum 2 kal taa ‘hmaaaanlai thil’ ka sawi ţhin a; ka 20 ral ka kai hnuin ‘hmanlai thil’ sawi tur ka hre tawh lova, kum 10 liam taa ‘hman kum thil’ chauh ka sawi thei tawh a; kum 50 ral ka kai hunah phei chuan kum 30 kal taa ‘tun hma thil’ bak sawi theih ka neih ka ring lo. Ka ngaihtuah hian dam rei lo tur ni ngeiin ka inhria.

Puilting lo tur

Mite ang lo takin zungţang thliaka ka kum ka chhiar theih tak loh hnu hian a kum telin ka ropuina a tlahniam a, ka zir tam zawh poh leh ka nep a zual hlauh thung. Nula hmaah ka tleirawl a reh thei lova, ka kum te hi lo pungin lo tam ta deuh pawh nise ka nu lakah ngat chuan ka puitlin theih ka ring love.

Sual si mawl si

Damchhung leh nun chhunga vanneih leh vanduai inkar zau zawng chhut chhuak miah lo tur khawpa finna lama pachhia ka ni a. Chuti chungin ka phak tawkin ngaihdan ka siam a, ka hmuh chin aţangin ka teh ve leh mai bawk a. Ka khawhawi a zimin ka hriat a tlem em a ‘rilru zim’ nih bak hlawh chhuah tur ka nei lo. Ropui ngai lo tur chi hi awm a nih ngai chuan keimah ang hi an ni ngei ang.

Felna lama rual pawl phak lo ka ni a. Ka nuin sualin mi pai a ni satliah lova, sualin min hring a, sualin ka piang a. Tun thlengin chu sualna chuan min la thlahthlam lo. Ţha tura ka rin angin nun ka tum ve ngei a, fel loh aleiah ka la tlin lo ta dah a; misual – chhandam ngai – mai ka ni e.

Rinna leh Siamtu

Thih hnua van lawn tumin ngaihruatnain ka ring ve chang chang chauh a. Chu rinna derthawng tak chu Amahah ka nghat a, min tithlawn lovang tih ka beisei ve fan. Ka chhiar a tlem em a A awm loh rin nachang ka lo hre ve pek lova. Engkim hi Amah aţanga chhuak, Amah veka tawp tur a nih bak rin ngaihna ka hre der lo.

Chungte chu sawi lohva leng, ka chhehvel thilsiamah A hmel hmuh tumin ka bih ve ngial zawk ţhin a; ni, hmu thiam teh vak lo mah ila thil tê tak têah te hian a themthiamzia hi a lang fiahin ka hre ve tlat. Van thengrenga kawng bik nei arsi chhiarsen loh zozai te khi a ropuina puanchhuahna ni ngei turah ka ruat a. Zan khaw thiang kara chhawrthlapui paw riai mai leh kawla tlai ni tla tur ka hmuh tik apiangin Siamtu hi mi lungleng a nih ka ringhlel love.