Zanin ngei hian mi ka ang lo fal leh ta. Urlawk zanah meuh pawh computer hmaah ţhuin thu ka ziah leh tak hi. Hman nawm loh hlauin ka rualpuite chu an phe suau suau a, kei erawhin phurna leh tha thona ka nei hran lo. Ral khata tlangval au ruai ruai te chu bengchheng chan a chang lek lek zawk.
Thlir dan tlangpuiah, zanin anga kei ang rual dar 11 vela mahni ina tawm sen ţul mai chu a luck lo thawmhnaw viau mai lehnghal a. Mahse, mi ka ang lo em a, pawi pawh ka ti lem hlei lova. Siamtharna eng emaw tak ka ngai a ni mahna le.
Tukverh bul maiah ka ţhu a, kawnga kal te pawh an lang chiang khawp mai. Hetia nula leh tlangval kawng kal thawm ri va hre thei renga han awm takah chuan thil tam ngaihtuah awl teh e. ' Nuam' kan tih lai tak te hi eng hi nge ni ang? Ţhiante puihna lova kal hlei thei lo te hian nuam an ti meuh ang chu maw. A kuahtu zawk hian a tum dan ang takin a hmang ang em le?
Ruih hian eng thil tha nge a thlen le? Khawvel nawmna a varpawh thei em ni? Patling meuh pawh lui kawra mut mai hreh lo khawpa mi diriam hmang a ni lovem ni? Hringtu nu leh pa pawh sual duh khawpa mihring chhia leh ţha hriatna kaihlektu mai chauh a ni lovem ni? Sum eiraltu, mawia lan a hneha mihring zahawmna zawng zawng hnuh hniamsaka nuihzabura mi siam ţhintu mai chauh a ni.
Zanin hian tleirawl eng zatin nge an thianghlimna hloh ang le? Nawm duh luatah an nun an hralh tih an hria ang em le? Hriatna tlem an nih vei nen, a bum duhtu an bo si lo! Vawi khat rah pelhin urlawk zan lo awm leh zel tur urlawk thei lovin a siam thei tih an hria ang em le? Vawi khat hman nawm luat hian damchhung nun pik a thlen thei tih hre hlawm tak maw?
Nun nuam nei tura duhsak tlak, nun ţha nei tlaka hmelţha an tlu leh mai ţhin hi a pawi tam teh e. Thlah ţha thlah a, chhuan ţha hring thei turin nun tak tem hmaa bawhchhiat an hmasak zel si chuan chi ţha hi tuhin a awm thei dawn em ni le?
Urlawk zan zet hi zawng zan danglam tak a lo ni. Engthawlna eng emaw tak a keng tlat a, engkim thianga ngaih mai pawh awl za te. Rilruah tlaivar a lang tlat a. Ţul vang ni miah lova Pawngsen tlaivar hram tumna hian mi a man nghet teh e. Hlim loh hlauhnain kan khat a, phak tawkah hlimna kan dap ţheuh a, hlimpui neih ngei kan tum ţhin a nih hi maw. He zan ang ema mala awm kan hreh zan hi awmin ka ring lo.
Hlim kan duhna leh nawm kan chakna te hi a ţhat tehlul nen kan tum danah erawh hmaihţhelh kan nei a ni. Midang nawmna zawn hmasak hi keimahni tan a lo nuam zawk zel a ni tihte hi kan hai tlat a. He hringnunah hian midang tana malsawmna thlen aia hlimawm a awm lo tihte hi kan ngaihtuah duh hek lo. Urlawk zan kan ur chiam a, hlimna leh nawmna aiin mualphona leh hrehawmna kan ur chhuak leh thin. Ngaihdan leh chin dan thlak theih a va duhawm em.
