Inngaihzawnna leh a dawt

Inhmelduhna hian induhsakna a hring a, inngainatna hian thil tam a hril ţhin. Chutiang a thlen hma chuan inngaihzawn hi thil theih a ni lo. Duh leh duh intawn meuh chuan khawvel hi kim riauin a hriat a. Tleirawl chhuah hlimin a nuam hlei hlei. Lairilah kan nui ver ver a, khawvel hi mawi riauva hmuh loh theih a ni lo. Zing ni chhuak hi chibai buk mai a chakawm a, zankhawthiang taka thla eng no nghulh te hian min tur ut ut thei nia!

Inngaihzawnna kuanga luangliam - hmangaihna lipuiah kan han cheng a. Mahni chauhva cheng ta lo chu a chauh chang ni a lo thlenin kan indawm a, tlak theih a nih lam kan ngaihtuah ngai lo. Nun hi a vul a, lunglen a nuam a, harsatna pawh hi Pathian hnenah ai mahin kawppuite hnenah kan thlen tam zawk ta ve ang. Inhauh leh tihtauh te hlei hlei hi a nuam a niang, a ruhno zawk hian an ching duh phian a. Inthlem leh inlem te hian nun a tinung hliah hliah thin.

Chutia inngaizawng ve reng ta chu, reiloteah nupui pasala invawn kan duh thuai a. remchang kan dap thuai thin. Mipain a tlangvalna kalsan a hreh lohna leh hmeichhiain a nulatna rauhsan a hreh lohna hi thil namai a ni lo. Huaisen f> a ngai. Damchhung thil a ni tlat! Tlin lohna nen lama inpawm lo chuan nupaa insiam theih a ni lova, mahni tabil ni tawh lo tura innei tawn tur chuan inhlan a ngai.

Chu mai a la ni lo, nunna siam thar enkawl a keng. Chhungkaw thil a ni tlat. Thil nung nafam chu ch^wma hrai chuan a seilian ngei ang; mahse, enkawl puitlin erawh thil dang daih a ni. Nupaa Kristian nih pawh thil nihphung pangngai a ni ang; mahse, rinna dik leh nghet nei tura fanaute zirtir tur zet chuan tisa leh thlarauah inpeih a va ngai em! Anni hi kan ram nghahfak, leilung luah turte chu an ni si a, nun tha leh dik kawhhmuh a va ţul tehreng em.

Nupa thu chu a r>l fel mai theih ta ve ang; chhungkua erawh mi pahnih maiin a siam love. Politics tuichilh lo mah la luhchilh loh theih a ni lo. Chhungkaw inrelbawlna fel lo chu khawtlangah a lang chhuak a, ram pum a nghawng. Chu mawhphurhna hrui chuan taiah a hreng a, duhna lama herpui theih ni mah se a finthlak ber lo fo. Mahni duhna dah tha a, chapona phat a, remna siam tura thuhnuairawlh chu tihmakmawh a ni.

Heng hi engtik niah emaw chuan ka la hmachhawn ve ngei ang a, Pathianin chi thlah tura min kohna hi chhan ve ngei ka duh ang. Thei tak ang i maw... tum chu a thiang tho ang chu...